metro ki chehal pehal mein
tumhare kad ke ladkon mein
tumhein dhundte paya hai maine
dil se ladte jhagte
paao patakte
khud se naraaz
khudi ko manaya hai maine
Ankhon ki nazar se paar
jahan andhera hai aur ujala bhi
us sifar mein jaha kuch nahi
ek sapna sajaya hai maine
Jahan bheed hui
wahan tum bhi hoge
isi udher-bun mein
bheed ko apnaya hai maine
ye jaanti hu tum ho nahi
par tab bhi tumhari tasveero ko
mujhe dekhte, aankh milaate
hilte-dulte paya hai maine
Sab jaan kar bhi
jhooth ko maan kar bhi
hosh mein hosh ko kho kar
jhooth se dil lagaya hai maine
Itne saalon ke baad bhi
purani yaadon mein
aaj ko dubaya hai maine
metro ki chehal pehal mein
tumhare kad ke ladko mein
tumhein dhundta paya hai maine
